Isti dulce falar de los astures
Contién abondes voces celto-iberes
Greco-llatines, gótiques, caseres,
Coyendo del romance les más pures,

Del provenzal y l'árabe, y mestures
D'italianu y francés pa menesteres,
Que mezclándose toes de maneres
Formen l'idioma pa dicer ternures,

Pa galantiar los mozos pela aldea,
O platicar del campu y sos llabores,
O al par del llar si un vieyu venerable

Con historiesy cuentos nos recrea,
Con poesíes y páxaros y flores,
Dichos y penes en sabrosu bable.