Conventiculum Rusticum Vasintoniense
habebitur mense Iunio exeunte ineunteque mense Iulio anni MMV
in media Vasintonia Civitate in regione Aqualbensi (Wenatchee).
Sessiones praeparatoriae: d. 22o et 23o m. Iunii
Conventiculum Rusticum praecipuum: de d. 24o usque per diem 29um m.
Iunii
Excursio Stehecinana: de d. 30 o m. Iunii ad d. 3um m. Iulii
Moderabuntur
▪Stephanus Berard, Ph.D., professor linguarum apud Studiorum Collegium
Vallis Aqualbensis
▪Iacobus Dobreff, M.A., Gradus Doctoralis Candidatus apud Vniversitatem
Lundiensem atque unus ex editoribus illius "Axel Oxenstierna
Correspondence Project"
▪David Morgan, Ph.D., Professor linguae Francogallicae apud Studiorum
Vniversitatem Furman Carolinensem Meridionalem
Aderunt et alii moderatores volubiliter Latine loqui valentes.
Vt nomen ad conventiculum participandum des, invise situm apud
http://www.wenval.cc/boreoccidentales/boreo_latin/conventiculum.asp .
Hoc Conventiculum Rusticum optimam praebebit occasionem sermonem
Latinum vivissimo modo exercitandi, nam singulis fere diebus
excursionem didascalicam et ambulatoriam faciemus in qua licebit
participibus non solum sermones sponte conserere sed etiam omnia quae
viderint sermone Latino, adiuvantibus moderatoribus, fuse describere:
arbores et plantas, montes et moles glaciales, fluvios, animalia, aves,
insecta, caelum aliaque multa. Imprimis placebit huiusmodi
conventiculum eis quibus cordi sint variae amoenitates locorum quique
ament amice garrientes, linguae peritiam meliorem facientes silvas et
montes et alia loca rustica perlustrare. Ambulationes et faciles et
paulo difficiliores cotidie fieri poterunt, necnon volentibus erit
etiam saepius occasio arduarum ambulationum montiumve ascensuum
suscipiendorum.
Vltimi tres dies duaeque noctes conventiculi excursioni dabuntur
Stehecinanae, scilicet in viculum nomine Stehecinum (Anglice Stehekin)
inter ipsos Cataractarum (Cascades) Montium septentrionalium vertices
situm. Cum nonnisi via aquatica possit adiri Stehecinum, conventiculi
participes die 30o mensis Iunii 55 milia passuum per Chelanum Lacum
(Lake Chelan) ad vicum vehentur dieque 3o mensis Iulii revertentur
Aquas Albas (Wenatchee). Dies primum et secundum m. Iulii, quos omnino
in locis Stehecino circumiacentibus degemus, participes verisimiliter
in manus minores inter se diversa agere cupientes dividentur. Licebit
profecto eis qui iter Stehecinum facere nolint maturius ex conventiculo
discedere.
Quibus sit Idoneum Conventiculum
Aeque invitantur et ludi magistri et praeceptores scholarum superiorum
et professores, enixeque commendamus conventiculum hoc studiosis
linguarum classicarum graduatis non tantum quod facultas Latine dicendi
peritiam et legendi et scribendi mirum in modum corroborat verum etiam
quod, ut Latinitas viva, quae nobis cordi est et ad quam nitimur,
prorsus renascatur, imprimis necesse est ipsis futuris praeceptoribus
linguam nostram pro instrumento omnino ad vivendum apto habere eamque
ut omnibus demum rebus humanis, vel modernissimis, exprimendis parem
tractent et doceant. Etiam eos qui fundamenta grammatica Latina
didicerint Latineque iam satis bene legere valeant necdum tamen Latine
colloqui possint ex animo cohortamur ut hoc conventiculum participent
primosque suos sermones Latinos nobiscum serant. In conventiculis
nostris colloquio Latino datis nullo modo est eis trepidandum
erubescendumve qui nondum Latine locuti sint; nam nos fere omnes potius
nuper quam pridem initium Latine loquendi fecimus, cuius initii
difficultatem funditus comprehendimus.
Omnibus qui aliquot loquelae Latinae elementa generalia exercitare
velint erit occasio tribus diebus ante conventiculum incohatum
adveniendi ut diebus 22o et 23o mensis Iunii varias res familiariores
una cum Stephano Berard et Iacobo Dobreff et forsan aliis moderatoribus
Latino sermone celebrent, verba nova locutionesque utiles discant,
linguam sibi aliquantum solvant, fiduciam loquendi firment.
Sessiones Praeparatoriae: Aquis Albis
Sessiones praeparatoriae diebus 22o et 23o in Collegio Vallis
Aqualbensis (Wenatchee Valley College) habebuntur. Noctibus 21a et 22a
participes mansionem aut privatam et gratuitam aut in deversorio modici
pretii habebunt—aut ex arbitrio in areis excubatoriis urbi proximis in
tentoriis vehiculisve habitabilibus mansitare poterunt.
Vrbs Aquae Albae in civitatis Vasintoniae media parte sita est ad latus
orientale illorum montium continuorum quibus est nomen Cataractae
(Cascades) atque ad ripam Columbiae Amnis, in America Septentrionalis
post Mississippiam magnitudine secundi. Vasintonia media varietatem
insolitam locorum ac “microclimatum” continet, quamobrem est situs
rerum naturae ordini visendo observandoque peridoneus. Sunt ibi
complura systemata montana, montes ignivomi, loca vulcanica,
conformationes geologicae detectae, moles glaciales campique
conglaciati, silvae conigerae et caducae necnon silvae pluviales,
flumina, rivi, rivuli, cataractae, fluminum vada candicantia, prata et
plana herbida, tractus agriculturae dediti, pomaria, deserta loca et
semiarida et omnino arida.
Ipsa “urbs,” quae dicitur, Aquae Albae, “Caput Mundi Mala Colentis,” ut
quidem nuncupatur, in “umbra pluviali” (sc. loco a quo imbres
coerceantur) Cataractarum Montium iacet atque media in regione agraria
irrigata Vasintoniensi. Vtpote temperie satis aprica praedita, Vallis
Aqualbensis a multis petitur ea oblectamenta agere volentibus quae
foris agi possint. Incantati Montes, proximum systema montium
praeruptorum basalticorum, dimidia hora autocinetica Aquis Albis
distantes, usque 7,000 fere pedum altitudinem silvis conigeris Alpinis
frondent. Montium Incantatorum summum cacumen, Stuart Mons (9,416 pedes
/ 2,870 metra altus), septentrionali in latere tribus systematibus
molium glacialium obtectum est.
Iter autoraedarium montuosum inter Seattlum et Aquas Albas, sive per
Viam Publicam 2 sive per Viam Interstatalem 90 et Viam Publicam 97,
satis quidem magnificum sed semitis in altissimis montium partibus haud
comparandum, properantes circiter duabus horis et dimidia conficient,
otiosius itinerantes tribus. Vrbs Aquae Albae aditur et aërie per
Aëriportum Memorialem Pangborn et ferriviarie (Amtrak) et
laophorice (Greyhound).
Conventiculum Praecipuum: in Villa “Faciei Sordidae”
Conventiculi pars praecipua, scilicet itinere Stehecinano prior, in
perpulchra villa rustica “Dirty Face Lodge” habebitur, cuius est
inscriptio Interretialis www.dirtyfacelodge.com
<http://www.dirtyfacelodge.com>. Noctibus a 23a ad 29am Iunii
mensis ibidem deversabimur, quamquam eis qui velint erit etiam facultas
excubandi. Villa, culina et natabulo et thermis scatebrosis instructa,
in silva sita est prope Lacum Aqualbensem, haud procul a semitis per
quas Latine loquentes ambulabimus. Sessiones generales et acroases de
rebus naturalibus in ipsa villa habebuntur.
Iter Stehecinanum: in Villa Stehecinana
Villae Stehecinanae Cataractarum Septentrionalium (North Cascades
Stehekin Lodge), cuius situs supra descriptus est, pagina domestica
aditur apud <http://www.stehekin.com>.
De Pretiis et Cibis
Discpulis aut toti conventiculo aut parti interesse volentibus erit
solvendum pretium aditiale 75 thalerorum ante diem 10um mensis Aprilis
anni MMV. Ceteris solvendi erunt 100 thaleri. Vni cuique
suademus ut citissime locum in Conventiculo Rustico reservandum curet,
nam non erunt plus 25 loca.
Pleraque prandia in ipsis ambulationibus sumentur. Cunctis in
ambulationibus erit cuique participi et prandium et aqua portanda. Qui
velint cenabunt una, Latine usque colloquen¬tes, sive in aedibus
nostris sive in cuiusque loci cauponis.
Sessionum Praeparatoriarum participibus erunt Aquis Albis variae
mansionis facultates. Deminuto pretio apud deversorium nomine
Caupona Pomaria pernoctare poterunt (Orchard Inn:
http://www.ohwy.com/wa/q/qq140495.htm; tel: 509-662-3443). Quo in
xenodochio deversari volentes solvent singulis noctibus $54 pro
conclavi simplici, $59 pro conclavi duplici, sc. solvet quisque ex
duplex conclave com¬muni¬can¬ti¬bus $29.50.
Suademus ut sessionum praeparatoriarum participes ad noctes 21am et
22am mensis Iunii conclave quam primum reservent, “conventiculi Latini”
mentionem facientes ut pretium accipiant deminutum. Series
quattuor conclavium (duorum duplicium et duorum simplicium) iam
asservata est nomine Stephani Berard, a quo confirmationis numeri
accipi possunt. Cui seriei facile erit mature petentibus plura
addere conclavia. Conclave sibi reservantes mansi¬onis
rationem a chartula creditoria Stephani propriam ad chartulam
transferant!
Sunt autem Aquis Albis alia deversoria multa, quorum nomina
inscriptionesque in Interete facile comperiri possunt (inscriptis
scilicet verbis indagatoriis “Wenatchee Washington Hotels”). Sunt
etiam prope Aquas Albas multi campi excubatorii, sicut “Wenatchee
Confluence State Park” (509-664-6373), qui omnium proximus est, necnon
et “Lincoln Rock State Park” (509-884-8702) et “Squilchuck State Park”
(509-664-6373) aliique.
In Villa Faciei Sordidae, ubi septem dies deversabimur, propterea quod
Collegium Vallis Aqualbensis, Maecenas noster, societas commodi publici
est, pretia solvemus deminuta.
▪Qui proprium conclave simplex, lecto magno instructum, habere volunt
37 fere thaleros pro singulis noctibus, sc. $260 pro tota septimana
solvent. (Hoc temporis restant talia conclavia tantum duo.)
▪Est unum conclave duplex, duobus lectis instructum, cuius inquilinus
quisque tantum $200 solvet sive $28.57 pro nocte.
▪Est etiam unum conclave magnum triplex, tribus lectis instructum,
cuius inquilinius quisque 133 tantum thaleros solvet sive $19 pro nocte.
▪Fieri potest ut unus alterve in villa pernoctans particeps alterum
invitet ut in conclavi suo “intus excubet.” Qui “intus
excubantes” solvent $10 pro nocte. De talibus collocationibus
quibuscumque faciatis quaesumus Stephanum certiorem.
Notate bene: Qui primi locum in villa petent hospitii genus
praedilectum accipient!
▪Qui in Villae Faciei Sordidae campo excubare volunt solvent $7.50
singulis pro noctibus (sive summam $52.50) ut excubent et $73 ut villae
commodis septem dies utantur. Ad summam igitur solvent
$127.50.
▪Alibi excubare volentes camporum excubatoriorum magnam copiam
invenient, quorum proximus est “Lake Wenatchee State Park”
(509-763-3101). Extra villae nostrae campum excubantes solvent
$73 ut villae commodis septem dies utantur. (Sed de stipendio ad
hoc pretium exsolvendum discipuli rogent Stephanum!)
In Villa Stehecinana pretia deversandi, quae plerumque maiora erunt
quam apud Villam Faciei Sordidae, fluctuant inter $150 et $300 pro
trinis noctibus. Multi conclave cum alio vel aliis communicare
volent. Omnibus qui et ad conventiculum et ad iter Stehecinanum
nomina dederint suppeditabitur index inscriptionum participum quo
facilius singuli sibi contubernalem inveniant. Est etiam proxime
villam campus excubatorius pulcher si quis excubare velit. Eis
qui ex longinquo venerint suppeditari poterunt forsan et tentoria et
sacci dormitorii aliquot, scilicet ne multa instrumenta excubatoria
aëroplanis sint advehenda.
Notate bene: Qui primi locum in villa petent hospitii genus
praedilectum accipient!
Horno erit forsan et fiscus studentilis generalis quo succurretur
discipulis ad singula varia solvenda, velut itinera coenautocinetica
intra Vallem Stehecinanam facienda, birotas conducendas, etc.
Vectura in cymba cui nomen “Lady Express” (apud www.ladyofthelake.com
<http://www.ladyofthelake.com>) 47 thaleris constabit.